കാറൽമണ്ണ വേദഗുരുകുലത്തിൽ ആഷാഢ ശുക്ല പൂർണ്ണിമ (വൈദിക സായന പഞ്ചാംഗമനുസരിച്ച് ഗുരുപൂർണ്ണിമ) ദിനാചരണം വിവിധ പരിപാടികളോടെ ഭംഗിയായി നടന്നു.
വിശേഷ യജ്ഞത്തോടെയാണ് ചടങ്ങുകൾ ആരംഭിച്ചത്. ഒരുമാസം നീണ്ടുനിൽക്കുന്ന വിവിധ ധർമ്മപ്രചാരണ പരിപാടികൾക്കും ഈ ദിനത്തിൽ തുടക്കമായി. വേദഗുരുകുലത്തിലെ രണ്ട് ബ്രഹ്മചാരികളുടെ ഉപനയന – വേദാരംഭ സംസ്കാരങ്ങൾ വൈദിക രീതിയിൽ നടന്നു. വേദഗുരുകുലം പ്രധാനാചാര്യൻ അഖിലേഷ് ആര്യ, അധിഷ്ഠാതാവ് ശ്രീ. കെ. എം. രാജൻ മീമാംസക് എന്നിവർ ചടങ്ങുകൾക്ക് കാർമ്മികത്വം വഹിച്ചു.
വേദപ്രചാര മാസാചരണത്തോടനുബന്ധിച്ച് വേദഗുരുകുലത്തിൽ നിന്ന് പുതിയ വൈദിക പഠന കോഴ്സുകൾക് തുടങ്ങാൻ പദ്ധതിയിട്ടിട്ടുണ്ട്. കൂടാതെ, ആഷാഢ പൂർണ്ണിമ മുതൽ ശ്രാവണ പൂർണ്ണിമ (ഉപാകർമ്മം അന്നാണ് നടക്കുന്നത് ) അതായത് 2026 ജൂൺ 29 മുതൽ ജൂലൈ 29 വരെ ഒരു മാസക്കാലം വെള്ളിനേഴി ആര്യസമാജം പ്രസിദ്ധീകരിച്ച വൈദിക സാഹിത്യങ്ങളുടെ പ്രത്യേക പ്രചാരണത്തിനും ആകർഷകമായ ഡിസ്കൗണ്ടോടെയുള്ള വിതരണത്തിനും തുടക്കമായി.
മഹർഷി ദയാനന്ദ സരസ്വതിയുടെ അമരഗ്രന്ഥമായ സത്യാർത്ഥപ്രകാശം കൂടുതൽ ധർമ്മജിജ്ഞാസുക്കളുടെ വീടുകളിലെത്തിക്കുന്നതിനുള്ള പ്രചാരണവും ദയാനന്ദ സന്ദേശം ഡിജിറ്റൽ വൈദിക മാസികയുടെ പ്രചാരമാസവും ഈ അവസരത്തിൽ ആരംഭിച്ചു.
പരിപാടിയിൽ പങ്കെടുത്ത എല്ലാ ധർമ്മസ്നേഹികൾക്കും, സഹകരിച്ച എല്ലാവർക്കും ഹൃദയം നിറഞ്ഞ നന്ദി.
🙏 TEAM ARYA SAMAJAM KERALAM
