ഹിന്ദു സമാജത്തിന്റെ ദുരവസ്ഥ
✍ കെ.എം.രാജൻ മീമാംസക്
ഒരു ശനിയാഴ്ച ദിവസം അതിരാവിലെ ഹിന്ദുസമാജത്തിലെ ചിലർ ശനിഭഗവാന്റെതെന്ന് പറയുന്ന ശനീശ്വര ക്ഷേത്രത്തിലേക്ക് പോകുന്നത് കണ്ടു. അതുകണ്ടപ്പോൾ എൻ്റെ മനസ്സിൽ ഒരു സംശയം തോന്നി — ഈ ശനിഭഗവാൻ ആരാണ്? ഈ ആളുകൾ എന്തിനാണ് ശനീശ്വര ക്ഷേത്രത്തിലേക്ക് പോകുന്നത്? തന്ത്ര സമുച്ചയത്തിലോ മറ്റേതെങ്കിലും പ്രാമാണികമെന്ന് താന്ത്രികർ മുന്നോട്ട് വെക്കുന്ന ഗ്രന്ഥങ്ങളിലോ ഇത്തരം ഒരു പദ്ധതി എന്റെ ശ്രദ്ധയിൽ പെട്ടിട്ടില്ല. 🪔
വിനയാന്വിതനായി തോന്നിയ ആ കൂട്ടത്തിൽ പെട്ട ഒരാളോട് ചോദിച്ചപ്പോൾ അദ്ദേഹം പറഞ്ഞു: “ശനിഭഗവാന്റെ ക്രോധത്തിൽ നിന്ന് രക്ഷപ്പെടാനാണ് ആളുകൾ ഈ ക്ഷേത്രത്തിലേക്ക് പോകുന്നത്. 🛕
ഞാൻ അദ്ദേഹത്തോട് തുടർന്ന് ചോദിച്ചു: “ശനീശ്വരക്ഷേത്രത്തിൽ പോയി നിങ്ങൾ എന്താണ് ചെയ്യുന്നത്?” 🪔
അദ്ദേഹം മറുപടി പറഞ്ഞു: “ഭക്തർ ശനി ഭഗവാന്റെ പ്രതിമയിൽ എണ്ണ അഭിഷേകം നടത്താറുണ്ട്. പണം സമർപ്പിക്കാറുണ്ട്. അങ്ങനെ ചെയ്താൽ ശനിഭഗവാന്റെ ക്രോധം ശമിക്കും. നാം അദ്ദേഹത്തിന്റെ കോപത്തിൽ നിന്ന് രക്ഷപ്പെടും.” 🪔
ഞാൻ വീണ്ടും ചോദിച്ചു: “ശരി, ഒരു കാര്യം പറഞ്ഞുതരുമോ? —ഈശ്വരൻ ക്രോധം കാണിക്കുമോ? കാണിച്ചാൽ എന്തിനായിരിക്കും അത് ?” 🪔
അദ്ദേഹം അല്പനേരം മൗനമായിരുന്നു. പിന്നെ പറഞ്ഞു: “നാം തെറ്റായ പ്രവൃത്തികൾ ചെയ്യുമ്പോൾ ഈശ്വരൻ അതിന് ശിക്ഷ നൽകുന്നു. ആ ശിക്ഷയിൽ നിന്ന് രക്ഷപ്പെടാനാണ് നാം ഇങ്ങനെ ചെയ്യുന്നത്. ഭക്തി ഏതുരൂപത്തിലും ആകാം. നാം അവിടെ പോയി ഇത്തരത്തിൽ നമ്മുടെ ഭക്തി പ്രകടിപ്പിക്കുന്നു.” 🪔
ഞാൻ ചോദിച്ചു: “അപ്പോൾ, ഇതെന്ത് തരത്തിലുള്ള ഈശ്വരനാണ്? കുറച്ച് എണ്ണയും പണവും നൽകിയാൽ ഭക്തന്റെ പാപങ്ങൾ ക്ഷമിക്കുമോ? ഇത് അത്ര നല്ല സംവിധാനം ആണോ? — ആഴ്ച മുഴുവൻ പാപം ചെയ്ത് ശനിയാഴ്ച കുറച്ച് എണ്ണ ക്ഷേത്രത്തിൽ കൊണ്ടുപോയി അദ്ദേഹത്തിന് സമർപ്പിച്ചാൽ പാപങ്ങൾ മാഞ്ഞുപോകും!” 🪔
അദ്ദേഹം ‘നമസ്തേ’ പറഞ്ഞ് മുന്നോട്ട് പോയി.🪔
ഞാൻ മനസ്സിൽ ഈശ്വരൻ്റെ ഗുണ – കര്മ്മ – സ്വഭാവം എന്നീ വിശേഷതകളെ കുറിച്ച് ആലോചിച്ചു. വേദങ്ങളിൽ ഈശ്വരൻ “ദയാലുവും ന്യായപ്രിയനുമാണ്” എന്ന് പറഞ്ഞിരിക്കുന്നു.
ഈശ്വരൻ ദയാലുവാണ്, കാരണം, അദ്ദേഹം ഓരോരുത്തരെയും അവർ ചെയ്യുന്ന പാപങ്ങൾക്കനുസരിച്ച് വീണ്ടും അത്തരം പാപങ്ങൾ ചെയ്യാതിരിക്കട്ടെ എന്ന ഉദ്ദേശ്യത്തോടെ ശിക്ഷിക്കുന്നു — അതാണ് യഥാർത്ഥ ദയ.
പാപം ചെയ്തവനെ ശിക്ഷിക്കാതെയിരുന്നാൽ, അയാൾ ദിവസേന കൂടുതൽ വലിയ പാപങ്ങൾ ചെയ്യാൻ തുടങ്ങും. അങ്ങനെ സമൂഹത്തിന്റെ സമ്പൂർണ്ണ ധാർമ്മിക വ്യവസ്ഥ തന്നെ തകർന്നുപോകും.🪔
ഈശ്വരൻ ന്യായപ്രിയനാണെന്ന് പറയുന്നതിന്റെ അർത്ഥം — അദ്ദേഹം ആരെയും അധികമോ കുറവോ ശിക്ഷിക്കുന്നില്ല, ചെയ്ത പാപത്തിന് തുല്യമായ ശിക്ഷയാണ് ലഭിക്കുന്നത്.🪔
ഇന്ന് ചില അജ്ഞാനികൾ ഈശ്വരന്റെ ഈ നീതി വ്യവസ്ഥ മനസ്സിലാക്കാതെ, പ്രതിമയിൽ എണ്ണ ഒഴിച്ചാൽ, പണം സമർപ്പിച്ചാൽ പാപങ്ങൾ മാഞ്ഞുപോകുമെന്ന് പ്രചരിപ്പിക്കുന്നു.
ഇത് ഈശ്വരന്റെ കര്മ്മഫല വ്യവസ്ഥയോടുള്ള അപമാനമാണ്. കൂടാതെ സ്വയം അജ്ഞതയുടെ ഇരുളിൽ കുടുങ്ങുന്ന കൃത്യവുമാണ്.🪔
എണ്ണ ഒഴിച്ചാൽ പാപങ്ങൾ മാഞ്ഞുപോകില്ല. പാപത്തിൽ മുങ്ങിയ മനുഷ്യനെ അത് രക്ഷപ്പെടുത്തുകയുമില്ല. അബ്രഹാമിക് മതങ്ങളിലെ ദൈവത്തെ പോലെ സനാതന ധർമ്മം പ്രകീർത്തിക്കുന്ന ഈശ്വരൻ ഒരിക്കലും കോപിക്കുകയില്ല. അദ്ദേഹം നിർവ്വികാരനാണ്, സച്ചിദാനന്ദ സ്വരൂപനാണ്. അദ്ദേഹത്തെ ഉപാസിക്കേണ്ടത് യമ- നിയമ- ആസന – പ്രാണായാമ – പ്രത്യാഹാര – ധാരണ – ധ്യാന – സമാധിയാകുന്ന അഷ്ടാംഗ യോഗാഭ്യാസത്തിലൂടെയാണ് എന്നാണ് വേദാദി സത്യശാസ്ത്രങ്ങൾ ഉദ്ഘോഷിക്കുന്നത്. 🪔
ഇതാണ് ഹിന്ദു സമൂഹത്തിന്റെ ദുരവസ്ഥ — വേദങ്ങളുടെ ശുദ്ധമായ ഉപദേശങ്ങളെ ഉപേക്ഷിച്ച്, അവർ അന്ധവിശ്വാസങ്ങളുടെ കുരുക്കിൽ അലയുകയാണ്. അവരെ അത്തരം അന്ധവിശ്വാസത്തിൽ തളച്ചിടാൻ വ്യാപക ശ്രമങ്ങളും നടക്കുന്നുണ്ട്.🪔
വായനക്കാർ സ്വന്തം ബുദ്ധിയും യുക്തിയും ഉപയോഗിച്ച് ഉചിതമായ തീരുമാനമെടുക്കട്ടെ. 🪔
നാം സത്യത്തെ സ്വീകരിക്കുമോ, അതോ അസത്യത്തിന്റെ വഴിയിലൂടെ യാത്ര തുടരുമോ? എന്നതാണ് തീരുമാനിക്കേണ്ടത്.🪔
കടപ്പാട് : ഡോ. വിവേക് ആര്യയുടെ ഒരു ഓൺലൈൻ ലേഖനം.
🙏
✍ കെ.എം.രാജൻ മീമാംസക്
ആര്യപ്രചാരക് & അധിഷ്ഠാതാവ്,
വേദഗുരുകുലം & ലേഖരാം കന്യാഗുരുകുലം.
Mob: 7907077891
Email: kmrajanmeemamsak@gmail.com
