✍️ കെ. എം. രാജൻ മീമാംസക്
ഈ വർഷം നൂറാം രക്തസാക്ഷി വർഷം ആചരിക്കുന്ന ആര്യസമാജത്തിന്റെ സമുന്നത നേതാവായിരുന്ന സ്വാമി ശ്രദ്ധാനന്ദന്റെ മൂത്ത പുത്രൻ പണ്ഡിറ്റ് ഇന്ദർ വിദ്യാവാചസ്പതി എഴുതിയ ഒരു യഥാർത്ഥ സംഭവം താഴെ കൊടുക്കുന്നു.
സേട്ട് രഘുമൽജി തന്റെ കാലഘട്ടത്തിലെ പ്രശസ്ത ദാനികളിൽ ഒരാളായിരുന്നു. ആര്യസമാജത്തിൽ അദ്ദേഹത്തിന് വിശ്വാസം എങ്ങനെ പിറന്നുവെന്നതിന്റെ ഒരു ചെറിയ ചരിത്രവും ഉണ്ട് — അത് സേത്ത് ജി നേരിട്ട് പണ്ഡിറ്റ് ഇന്ദർ വിദ്യാവാചസ്പതിയോട് പറഞ്ഞിരുന്നു. ആ കഥയുടെ ചുരുക്കം താഴെപ്പറയുന്നതുപോലെയാണ്.
“നിങ്ങൾക്ക് അറിയാം, എന്റെ കട സ്ഥിതി ചെയ്യുന്നത് ഡെൽഹിയിലെ ചാവ്ഡി ബസാറിലാണ് എന്നത്. അതിനടുത്ത് തന്നെയാണ് ആര്യസമാജ് മന്ദിർ (സീതാരാം ബസാർ). ചിലപ്പോൾ ഞാൻ സുഹൃത്തുക്കളോടൊപ്പം ആര്യസമാജത്തിന്റെ സത്സംഗത്തിൽ പങ്കെടുക്കാൻ പോകാറുണ്ടായിരുന്നു. ഒരിക്കൽ കാംഗ്ഡി ഗുരുകുലത്തിന്റെ സ്ഥാപകനായ മഹാത്മാ മുൻഷീറാമിന്റെ (സ്വാമി ശ്രദ്ധാനന്ദൻ) പ്രഭാഷണം അവിടെ നടക്കുന്നതായി അറിഞ്ഞു. ഞാൻ ആ സത്സംഗത്തിൽ പങ്കെടുത്തു.
മഹാത്മാ ജി (സ്വാമി ശ്രദ്ധാനന്ദൻ) ‘സദാചാരം’ എന്ന വിഷയത്തെ വിശദീകരിച്ചുകൊണ്ട് വലിയ വിഷാദത്തോടെ പറഞ്ഞു — “ആര്യസമാജ് മന്ദിർ സ്ഥിതി ചെയ്യുന്ന ഈ ബസാറിൽ തന്നെ വേശ്യാവാസ കേന്ദ്രങ്ങൾ നിലനിൽക്കുന്നത് വളരെ ദൗർഭാഗ്യകരമാണ്. നഗരത്തിലെ പ്രശസ്ത വേശ്യകൾ എല്ലാം ചാവ്ഡി ബസാറിലാണുള്ളത്. അതുകൊണ്ടാണ് ഈ ബസാർ ദുരാചാരത്തിന്റെ കേന്ദ്രമായി മാറിയിരിക്കുന്നത്. അവർക്കുള്ള ചൗബാരകൾ (വാസസ്ഥലങ്ങൾ) വ്യാപാരികളുടെ സ്വത്തുക്കളാണ്. അവ വേശ്യകൾക്ക് വാടകക്ക് നൽകിയിരിക്കുകയാണ്. വാടകയിലൂടെ ലഭിക്കുന്ന ഈ പാപത്തിന്റെ സമ്പാദ്യം ഒരിക്കലും ഫലം കാണുകയില്ല. വേശ്യകൾക്ക് വീടുകൾ വാടകയ്ക്ക് കൊടുത്ത് പണം സമ്പാദിക്കുന്ന വ്യാപാരികളുടെ ജീവിതം തന്നെ നശിക്കുന്നു. അവരുടെ മക്കളുടെ സ്വഭാവവും നല്ലതാകുന്നില്ല. അങ്ങനെ സ്വഭാവം നഷ്ടപ്പെട്ടവരുടെ സമ്പാദ്യം നിലനിൽക്കുമോ? ഇവിടെ ഇരിക്കുന്നവരിൽ ചിലരുടെ കെട്ടിടങ്ങളിൽ വേശ്യകൾ താമസിക്കുന്നുണ്ടെന്ന് എനിക്ക് അറിയാം. അവർ അവരെ അവിടെ നിന്ന് പുറത്താക്കുകയാണെങ്കിൽ അവരുടെ വരുമാനം കുറയുകയല്ല, മറിച്ച് കൂടും എന്നതിൽ എനിക്ക് ഉറച്ച വിശ്വാസമുണ്ട്.”
സേട്ട് ജി പറഞ്ഞു — “മഹാത്മാ ജിയുടെ വാക്കുകൾ എന്റെ മനസ്സിനെ ആഴത്തിൽ സ്പർശിച്ചു. ഞാൻ സത്സംഗത്തിനുശേഷം നേരെ കടയിലേക്കുപോയി. എന്റെ കെട്ടിടങ്ങളിൽ താമസിക്കുന്ന വേശ്യകൾക്ക് ഒഴിഞ്ഞുപോകാൻ ഒരു മാസത്തെ നോട്ടീസ് നൽകി, കൂടാതെ കടയുടെ ഒസ്യത്തിൽ ഇങ്ങനെ എഴുതി — ‘ഈ തലമുറയിലെ ആരും ഭാവിയിൽ വേശ്യകൾക്ക് വീടുകൾ വാടകയ്ക്ക് കൊടുക്കരുത്.’ ഈ തീരുമാനത്തിന് ശേഷം എന്റെ ജീവിതത്തിലും, കടയിലും, മുഴുവൻ വ്യാപാരത്തിലും അത്ഭുതകരമായ മാറ്റം ഉണ്ടായി.”
അതിന് ശേഷം സേട്ട് ജി കണ്ണുനിറച്ച് പറഞ്ഞു — “എനിക്കറിയില്ല, അതിന് ശേഷം എങ്ങനെയാണ് ധനവർഷം എന്നെ തേടിയെത്തിയതെന്ന്. ആയിരങ്ങൾ ലക്ഷങ്ങളായി, ലക്ഷങ്ങൾ കോടികളായി മാറാൻ സമയം എടുത്തില്ല. അതോടൊപ്പം തന്നെ എനിക്കു ദാനത്തിലും വലിയ താത്പര്യം ഉണ്ടായി. ഞാൻ എത്രയും പണം ദാനം കൊടുത്താലും അതിനേക്കാൾ അധികം എന്നിലേക്ക് തിരികെ വരുന്നു. ഇതെല്ലാം സ്വാമി ദയാനന്ദനും മഹാത്മാജിയും (സ്വാമി ശ്രദ്ധാനന്ദൻ) നൽകിയ അനുഗ്രഹഫലമാണ്. ഇന്നത്തെ ദിവസം എനിക്ക് പണം എവിടെ വയ്ക്കണമെന്നറിയുന്നില്ല!”
ഇതാണ് സേട്ട് രഘുമൽ ജിയുടെ ജീവിതത്തിലെ മാറ്റത്തിന്റെ സംക്ഷിപ്ത കഥ.
1912-ൽ അദ്ദേഹം ഒരു ലക്ഷം രൂപ ‘കന്യാഗുരുകുലം’ സ്ഥാപിക്കാൻ ദാനം ചെയ്തു. അതിന് മുമ്പ് അദ്ദേഹം ‘ഇന്ദ്രപ്രസ്ഥ ഗുരുകുലത്തിനും’ ഒരു ലക്ഷം രൂപ ദാനം നൽകിയിരുന്നു. 100 വർഷങ്ങൾക്ക് മുമ്പ് ഒരു ലക്ഷം രൂപയുടെ മൂല്യം എന്തായിരുന്നു എന്നോർക്കുക! വേദാധ്യയനം നടക്കുന്ന ഗുരുകുലങ്ങൾക്ക് ദാനം നൽകുന്നത് ഏറെ പുണ്യവും വിശിഷ്ടമാർന്നതുമാണെന്ന് നമ്മുടെ വേദാദി സത്യശാസ്ത്രങ്ങൾ ഉദ്ഘോഷിക്കുന്നു.
ഡെൽഹിയിൽ രാഷ്ട്രത്തിന് വേണ്ടി ജീവൻബലിയർപ്പിച്ച രക്തസാക്ഷികൾക്ക് വേണ്ടിയുള്ള സ്മാരകം പണിയാൻ പട്ടൗഡി ഹൗസ് വാങ്ങാനുള്ള പദ്ധതി ഉണ്ടായപ്പോൾ, മഹാത്മാ ജിയുടെ (സ്വാമി ശ്രദ്ധാനന്ദൻ) ടെലഗ്രാം കിട്ടിയതോടെ അദ്ദേഹം കൊൽക്കത്തയിൽ നിന്ന് അറുപതിനായിരം രൂപ ദാനം ചെയ്യാൻ തയ്യാറായി. ചെറിയ ദാനങ്ങൾ അദ്ദേഹം നിത്യവും ചെയ്തിരുന്നു.
അദ്ദേഹം സ്ഥാപിച്ച “രഘുമൽ ട്രസ്റ്റ്” ഇന്നും വിദ്യാഭ്യാസത്തെയും ധാർമിക പ്രവർത്തനങ്ങളെയും പിന്തുണച്ച് പ്രവർത്തിച്ചുകൊണ്ടിരിക്കുന്നു.
കടപ്പാട് : (ആര്യസമാജ് കാ ഇതിഹാസ് എന്ന പുസ്തകത്തിൽ നിന്നുള്ള ഉദാഹരണം)
🙏
കെ.എം. രാജൻ മീമാംസക്
ആര്യ പ്രചാരക് & അധിഷ്ഠാതാവ്
കാറൽമണ്ണ വേദഗുരുകുലം
& ലേഖരാം കന്യാഗുരുകുലം, വെള്ളിനേഴി
